எத்தனை கட்சிகள்???

இந்திய தேசத்தில் தான்
எத்தனை கட்சிகள்???
நடக்கத் திராணியற்ற
நாற்காலிகளின் கட்சி ஓன்று
எதிர்காலம் தெரியாத
இறந்தகால கட்சி ஓன்று...
வரலாறு மறந்துவிட்ட
வர்க்கபேத கட்சி ஓன்று..

தலைவர்களால் நிறைந்துவிட்ட
தொண்டரில்லா கட்சி ஓன்று..
தொண்டர்களோடு தொடர்பில்லா
தலைவர்களின் கட்சி ஓன்று..
கட்சியே குடும்பமாக
குடும்பமே கட்சியாக
பரிணமித்துவிட்ட கட்சி ஓன்று..

ஓட்டுக்கேட்டு வரும்போது
ஒருகட்சி...
வாக்குவாங்கி வாழ்த்துரைக்கும்போது
ஒரு கட்சி...
பெட்டிகள் நிறைந்த ஜ(ப)னநாயகத்தில்
கொள்கைகளெல்லாம் குப்பையில்...

எதிர்கால இந்தியாவின்
இணையற்ற தூண்களுக்கு
என்ன செய்வதென்று
குளுகுளு அறையில்
கூடி விவாதிக்கின்றன
செல்லரித்த தூண்கள்...

இத்தனை ஆண்டு காலமாய்
மாறி மாறி தேடுகிறார்கள்
இரவில் பெற்ற அடிப்படை சுதந்திரம்
எங்கே என்று

பாவம் இன்று வரை தெரியவில்லை
அரசியல் கட்சிகளின்
கொள்கைகளோடு அதுவும்
அஸ்திவாரத்துக்கடியில்
புதைக்கப்பட்டிருக்கிறது என்று....

என்ன செய்ய நானும்
அரசியல் கட்சியொன்றின்
அடிப்படை உறுப்பினர்தானே...

எனவே நானும் தேடுகிறேன்
எனக்கான அடிப்படை உரிமைகளை...
இவர்கள் இருக்கும்வரை...
கிடைக்கப்போவதே இல்லை
என்று தெரிந்தும் கூட....